Total Pageviews

Thursday, February 24, 2011

ماذا أقول له؟

الحلو والبشع بالحياة هوي انو بغض النظر اديش نحنا حبينا او كرهنا اشيا او ناس، وبغض النظر عن اديش هلكنا وتكسرنا وتفجمنا سعياً للأفضل ويللي مش بالضرورة كان افضل شي ولكن افضل بنظرنا...

شيلو كل هالعوامل وبيبقى انو الحياة عم تتقدم وتستمر وتتغير. وهيدي اخر واحدة ركزولي عليا شوي زيادة: الحياة في حالة تغيير دائم. وهون السؤال بيطرح نفسو... كيف في ديمومة بالتغيير؟

في مرة شخص كتير عزيز عليي (لأنو القلب مشكوك ب وجودو فبالتالي اصبح هالشخص عزيز عليي ومش عا قلبي ) اي بقا هالفلان قلي شي كنت اول مرة بسمعو: التغيير هو الشي الدائم الوحيد. وهنا يا اطفالي تأتي المفاجأة ب انو اه نعم ادجل! هالغرام يللي حسيتوا ب قديم الزمان , كان... ويااااا ما كان. كان تعريف للروح وللوجود والحياة والشعور والجنون والعبثية والوحي ومن ثم تعريف العذاب و الشعور بالتغييب و الانفصال والضياع والفراغ- يعني من اكستريم لا اكستريم، هيدا كللللو بالاخر بيتغير.

بيختفي.

بيزول.

وكأنه لم يكن.

كأنو كان فكرة خرافية ما تحققت ولا تطبقت ولا حتى نكتبت عا قفا شي كرتوني ولا كان مقدرلا انو تنسمع.

وبقت فكرة ب راس أخوت مجنون. وفي حين انو من الجيد انو "الحياة تستمر وتكمل وما نوقف عند حد او حدا معين" ما فيني قول او اقبل انو هالعظمة والضخامة كلا هي الى زوال... لأنا رح تتغير بالنتيجة. لأنو رح نتغير مع الوقت ومع الحياة. ولك شو هالمصيبة؟ مين قال انو يوماً ما عنجد حا نصير اشخاص مختلفة؟ طيب ما انا بحبني هيك! عا نكهة التابسكو! وما بدي صير لا فريز ولا خردل ولا خل ولا شي... وما بدي الجبنة يللي حبيتا تصير بعدان مشمش بعلبك يللي ما استوى :( وما الحل يا ابنائي؟

الأمل... اي، في امل. نتأمل انو يوماً ما بعد سلسلة دائمة من التغيير نوصل لا مطرح نلاقي حالنا الناس يللي منحب نكونا. ونلاقي حالنا مع ناس حبينا نكونن او يكونوهن. ونلاقي حالنا نحنا بعد عمليات التغيير المتتابعة فعلاً مناح وخيرين للاخرين.

بس اهم شي انو نلاقي حالنا!

We’re just different people… خدلك بقا... هيدي جملة فيي الكثير من عدم الوفاء! عا شو جنينا؟ عا شو حبينا؟ وبكينا؟ وكتبنا؟ وغنينا؟ وبكينا؟ وبكينا؟ وشربنا؟ وكرهنا؟! وزعلنا وانقبرنا تعترنا؟ اذا بالاخر هيدا كلو subject to change و مش دايم؟

اذا بالاخر رح نرجع نوصل لنقطة او مطرح انو فينا نرجع لهالانسان يللي كان بدياتنا وقربلنا نهايتنا , ونقول -ومن كل عقلنا كمان- انو لأا! موش قادرة خلاص! اللي بينا انتهى!

اما كسرنا كؤوس الحب من زمن؟ فكيف نبكي كأساً كسرناه؟

وأهم شي... ماذا أقول له؟!!!!

1 comment:

  1. el dahab ya habibi .. bi dalou dahab .. mahma 2alou 3annou 2alou wel dahr n2alab .. el 3atab ya albi .. 3a ad el ma7abi .. ma3 el ma biyestahel .. shou nafe3 el 3atab .. el dahab ahhhhh ya habibi ..wlik bi dallou dahab !

    ReplyDelete